Danbaka - Albisteak

Kontzertuaren hasieran giroa nahiko hotz eta jende gutxi zegoen. Baina, gauak aurrera egin ahala hasi zen aretoa betetzen eta azkenerako giro polita egon zen.

Jim TNTk bere jarraitzaile finenak ekarri zituen. Los Cretinoseko taldekideak, besteak beste. Jaimek Amaia izan behar zuen lagun, baina Zarzuela zuela eta ezin izan zuen Elgetan egon. Hala ere, beste neska baten laguntza izan zuen taula gainean; bere arrebak abestu zuen kantu pare batean. Eta oso ondo abestu gainera!



Gaueko ikuskizuna Raul Lasak eman zuen. Eta nola ez, berarekin irten den aktore bilbotarrak, Rakelek. Itxura xelebrearekin irten ziren biak ere, paperean ondo sartuta. Jendeak barre majo egin zuen Rakelen antzezpenarekin eta atzean zegoen jendea ekarri zuten aurreraino. Ordura arte giroa hotz xamar zegoen, baina Raul Lasaren emanaldiak giroa berotu zuen.



Unnëakoak abenduaren 1a Hiesaren Aurkako Eguna omenduz, xingola gorria gitarran zutela irten ziren. Debagoienean geroz eta indar gehiago hartzen ari den pop estiloa gogotsu erakutsi zuten. Ez da guztia punka eta rocka izango, ezta?



Scameko gazteak izan ziren gaua itxi zutenak. Vans markako zapatilekin irten ziren denak, Joxebi managerrak gomendatu ote diete? Hor zebilen beraien manager fina argazkiak atera eta atera. Punkeroak izateaz gain, maceroak ere badirela ikusi genuen. Hor zituzten-eta baterian itsatsita Macintosheko pegatinak.



Musika bezain beste zaintzen dute estetika oraingo taldeek. Bakoitzak bere estiloari dagokion janzkera eta eszenaratzea egin zuten. Edizio honetan garbi geratu da eszenaratze ez ohikoak egiteak eta publikoa erakartzeak garrantzi handia duela. Ea bada hurrengo kontzertuan ze bitxikeria ikusten dugun!