Danbaka.com

Txapa Irratiaren aldeko kontzertu erraldoia eta diskoa

Iker — Fri, 09 May 2008 11:42:07 +0200

Bergarako Txapa irratian diru premia dute. Makro-kontzertu bat antolatzeko erabakia hartu dute eta Bergarako musikari guztiei luzatu diete gonbitea. Uztaileko lehenengo aste bukaeran egingo dute eta grabatutako materialarekin CD bat kaleratuko dute. Lehenengo bilera maiatzaren 17an egingo dute Txapa Irratian bertan.

Bergaran 20-30 bat talde daudela kalkulatzen dute Txapa Irratian. CD bat kaleratu nahi dute. Gaztetxean izango da makro-kontzertua uztailaren 4an eta 5ean eta bertan egingo dituzte grabazio lanak. "Grabazioa bi modutan egingo dugu", adierazi du Txapa irratiko Iñigo Herrerosek. "LR hartu eta zuzenian grabatuko dugu alde batetik. Zerbait txarto ateraz gero multipista batean ere jasoko dugu gero nahasketa egin ahal izateko".

CDa abendurako kalean egotea aurrikusten dute. Bertan, talde bakoitzeko kantu bana jasoko dute. CDarekin batera Bergarako taldeen gaineko fanzina ateratzeko asmoa ere badute. Guztia ondo antolatzeko maiatzaren 17an egingo dute Bergarako taldeekin lehenengo batzarra.

Duela bostpasei urte 'Isiltasuna apurtzen' izeneko bilduma kaleratu zuten Bergarako taldeekin. Gaztetxea estudio bilakatu zuten orduan. Oraingoan, zuzeneko grabazioak egingo dituzte.
Txapa irratiaren diru premiari irtenbide bat emateko antolatu dute makro-kontzertua. Hamar irratsaio ekoizten dituzte bertan eta 24 orduko programazioa osatzeko Arrosako beste 10 irratsaio jasotzen dituzte. Kasu honetan, deialdia Bergarako talde guztiendako da.

Aby-Kem talde bergararrak diskoa aurkeztu du

Maide Arregi — Wed, 19 Dec 2007 18:29:30 +0100

Donostiako Alde Zaharreko bibliotekako sotoan egin dute lehen diskoko aurkezpena. Bertan izan dira besteak beste, Gara, Berria, Noticias de Gipuzkoa, Herriko Burdina (Euskal Herriko webzinea) eta Goienako hedabideak. Danbaka Musika Lehiaketako koordinatzaile Iker Barandiaranek aurkeztu du taldea hedabideen aurrean.

Horren ostean taldekideek diskoaren nondik norakoak azaldu dituzte. Horrez gain diskoa osatzen duten eta taldeak dituen eraginen gainean luze mintzatu dira. Hala nola, diskoko hitzak eta lan horrek duen arabiar kutsuaren gainean azalpenak eman dituzte.

Disko berria: Azken Guda

Gaztelupeko Hotsak-ek kaleratu du Danbakarekin elkarlanean. Lehiaketa horren bigarren edizioko irabazleak izateagatik hain zuzen ere. Diskoan sei abesti daude, iraupen luzekoak guztiak; asko garatutakoak, alegia. Thrash metala, death-a eta beste soinu bortitzak lantzen dituzte abestietan. Disko hori eskuragarri dago dagoeneko Euskal Herriko hainbat disko dendatan eta erosteko aukera izango da baita ere Goinaren bitartez.

Diskoaren promo orria

Bergarako pantera beltzek oso argi daukate nahi dutena. Horregatik, 2004aren bukaeran boskote bihurtu zirenetik gogor burrukatu dute oztopo guztien kontra. Orain dela ia 3 urte demo bat grabatu zuten, baina grabazioaren soinuarekin ez ziren gustura gelditu. Horregatik grabazioa alboratu eta lokalean gogor entseatzeari eta zuzeneko gero eta indartsuagoak emateari ekin zioten. Hala, zuzenean ikusi ditugunok lasai asko esan dezakegu egiten duten kontzertuoro azken guda bailitzan burrukatu eta guztia ematen dutela.

Zerbait berria asmatzeko itsutasuna eta gaur egungo tendentziak alboratuta, metalaren erraietara jo dute zuzenean. 90eko hamarkadako thrash talde autentiko eta esanguratsuenen arima barneratu eta propio egitea lortu dute. Horri, gainera, death ukituak batu dizkiote, eta emaitza teknika oso landuarekin zizelkatutako indar eta amorruz betetako basamortuko ekaitza da.

Hartu duten esperientzia eta sendotasunari batzen badizkiogu egiten dutena erabat sinistu, eta hori ikus-entzuleei transmititzen ondo baino hobeto lortu dutela; ez gaitu harritzen Danbaka Debagoieneko Musika Lehiaketa ospetsuaren bigarren edizioko irabazle bilakatu izana.

Honako lan hau da lehiaketaren saria eta taldeak aspaldian landutakoaren emaitza: Bergarako panterek hain satanizatuta dagoen mundu arabiarrari keinu bat egin diote, eta bereak egin dituzte haiek sufritzen dituzten miseriak eta duten askatasun egarria. Euskaraz abestutako sei abestik osatzen dute lana, gogoz garatutako sei pieza, gordintasun, irmotasun eta une nostalgiko-epiko bezain birtuosoz josiak.

Eguzkien izpiek aska zaitzatela!

Musika eskaintza oparoa Bergaran Kilometroetan

Iker — Thu, 13 Sep 2007 18:32:29 +0200

Dagoeneko ezagutzera eman dute zein musika talde arituko diren urriaren 7an Bergaran ospatuko den Kilometroak jaian.

Aspaldian ohi den moduan musika dantzagarriak izango du bere lekua: Tolosaldeko Mulambo perkusio taldea, Kataluniako Rauxa runba taldea, Ekialdeko melodiak lantzen dituen Nour, Iñigo Muguruzaren Sagarroi, Trapatoni Circus Band elorrioarrak, Xabi Solanoren Esne Beltza proiektu berria eta Emon talde bergararra, besteak beste.

Folkari dagokionez, Trikizio zegamarrak, Tapia eta Leturia klasikoak, Pantxoa eta Peio bizirauleak eta beste igoko dira agertoki gainera.

Rocka osotasunean hartzen badugu, berriz, eskaintza zabala da baita ere: SKT Sekuentzia klasifikagaitzak, Kauta metaleroak, Gose elektronikoak, EH Sukarra rockero zaharrak, Fly Shit hardcoreak, Belceblues blueserockeroak eta abar.

Bakarlariek ere izango dute bere lekua, jakina: Anarik, Pettik eta Aitzol Mujika bergararrak, hain zuzen ere.

Bestalde, proposamen bereziagoen artean Iban Nikolai didjeridoo jolearen Samar taldea, eta bertso musikatuak egiten dituen Oinutsik nabarmenduko genituzke.

HARD ONS BERGARAKO GAZTETXEAN

flyshit — Fri, 24 Aug 2007 19:20:56 +0200

ABUZTUAK 28, ASTEARTEA BERGARAKO GAZTETXEAN:

HARD ONS (Australia)
KLOAKAO (Torrelavega)

ordua:20:00ak
sarrera: 6 euro

Steve Vai gitarra munstroa Bergaran

Iker — Wed, 04 Jul 2007 11:20:57 +0200

AEBetako Steve Vai gitarra munstroak kontzertua egingo du hilaren 8an Bergarako Jam aretoan. Vaik alboan Zack Wiesinger gitarra jotzaile gaztea izango du.

Steve Suro Vai munduko gitarra jotzaile onenetarikotzat dute aditu askok, Joe Satriani eta beste gutxi batzuekin batera.

Vaik Satriani izan zuen irakasle, eta ezagun egin zen Frank Zappa handiaren taldean esku hartu zuelako. Horren ostean, Satrianirekin "Rockaren kondairak" ekimenean esku hartu zuen; eta baita G3 edo Guitar 3 ikuskizunetan Satriani eta Eric Johnson, Yngwie Malmsteen edo Robert Frippekin batera.

Gitarra jotzaile birtuosoenak gustuko badituzu, ez galdu Vai ikusteko aukera!

Kilometroak 07ren kantua eta bideoklipa

Iker — Thu, 21 Jun 2007 19:17:50 +0200

Urriaren 7an Bergaran ospatuko den Kilometroak jaialdiko abestia eta bideoklipa aurkeztu dituzte astean Dokan, Donostiako Kafe Antzokian. Belceblues taldeko kide eta Arantzadi ikastolako irakasle Asier Elortzak konposatu du abestia.

Country eta euskal rocka batu dituzte Belceblues taldeko kideek eta lagun izan dituzten ikasle eta musikariek "Argi daukagu" izeneko abestian.

Bergarako Gaztetxian - 2007/02/24

AMONAL — Sat, 24 Feb 2007 23:09:45 +0200

Hona hemen Mikel Agirrek bere kamariakin jasotako bi harribitxi. Kontzertua etzan gaizki egon, baina irudi honeikin oroitzapen askoatik hobiak geldiketan ttuk! Mila mertxi Mikel (eta Peros eta Gorka ...) Eta baitta Potemkin eta Lukreciari be, eta han juntau zian zoro danei!
Bo!

Zein xabik bajua joten? Bull Bergarako Gaztetxian

Mikel Agirre — Sat, 24 Feb 2007 23:02:39 +0200

Marti bifurkatua, Bergarako gaztetxian (07-02-24)

Mikel Agirre — Sat, 24 Feb 2007 22:53:24 +0200

Kilometroak 07ren aldeko kontzertua

Iker — Thu, 08 Feb 2007 18:55:41 +0100

Otsailaren 23an, egubakoitza, Kilometroak 07ren aldeko kontzertua egingo dute Bergarako Jam aretoan.

Honako taldeak arituko dira zuzenean; Matx, Radio Wings, Aby-kem eta Yotox.

Sarrerak 3 eurotan salgai daude Bergarako Etxagi, Arrano, Kortazar, Pol-Pol eta Ikastolan.

Urtarrilean ere zaunka-tour

Zaunka — Wed, 03 Jan 2007 17:44:55 +0100

Ze xauk?

Urtarrilean ere Zaunka egin zuten tourraren jarraituko dugu:

Urtarrilak 5, Bergarako gaztetxean, Amonal eta Lukreciarekin.

Urtarrilak 6, Ondarruko gaztetxean.

Urtarrilak 13, Zaldibarren, Neubatekin.

Urtarrilak 27, Gasteizko Helldoradon, Neubat eta Sharon Stonerrekin.

Arianeren aldeko kontzertua Bergarako gaztetxean

Iker — Wed, 08 Nov 2006 16:01:59 +0100

Azaroaren 11n, zapatua, Ariane neskatilaren aldeko kontzertua egingo dute Bergarako gaztetxean.

Bergarako 5 urteko neskatila horrek garuneko minbizia dauka, eta hari laguntzeko hainbat bide zabaldu dira.

Hilaren 11ko kontzertua 19:00etan izango da, eta honako taldeek esku hartuko dute: Pedre, Larra eta Garate bakarlariek, Mahaster River, Rotten Teenagers, Supercoolsek, eta baita DJ KRC-k ere.

Horrez gain, Arianeri laguntzeko webgunea eta hainbat kontu korronte zabaldu dituzte:

Kutxan, 2101 00 70 89 0134501733

Euskadiko Kutxan, 3035 00 09 19 0090078448

Bergarako musika taldeen entsegu lokalak kolokan

Iker — Mon, 06 Nov 2006 13:21:06 +0100

Bergarako musika taldeak oso arduratuta daude goiko geltokiko eta Zabalotegi azpiko entsegu lokalak kolokan daudelako.

Musika taldeen esanetan, Udalak ez du eurengana jo, baina dagoeneko hiruzpalau aldiz goiko geltokiko argindarra moztu diete, eta egun baten lokalen alboan langileak aurkitu zituzten lanak hasteko asmotan.

Udalak jakinarazi du goiko estazioko eraikinaren egoera aztertu gura duela, eta egoera txarrean badago, musika taldeak handik kanporatuko dituela. Musikariek ez dute uste eraikinaren egoera txarra denik –"asko jota teilatuak beharko du konponketaren bat", azaldu ziguten–, eta handik kanporatu behar badituzte, beste alternatibaren bat eskaintzea gura dute.

Goiko estazioan eta Zabalotegiko azpian 20 taldetik gora dabiltza entseguak egiten: Lord Witch, Aby-Kem, Cool Panic, Fly Shit, Dixie 900, Supercools, Rotten Teenagers, Extorsion, Doublyn boys, Against the rapist, Kogollo party crew, Elevators eta beste batzuk. Horiez gain, gainera, disc-jockeyak ere lanean ibiltzen dira eta beste batzuek grabazio eta produkzio lanak egiten dituzte.

Arkada Sozialen agurra Jamen egingo dute

Iker — Thu, 02 Nov 2006 13:09:32 +0100

Arrasateko Arkada Sozial taldeak behin betiko agurreko kontzertua egingo du azaroaren 18an Bergarako Jam-en.

Punk-Oi! talde hori hiruzpalau kontzertu emateko bueltatu zen urtearen hasieran: Añorgan, Arrasateko Elkartasun Egunean eta Arrasateko 3.60 aretoan egin zituzten emanaldi horiek.

Baina, azkenekoan, 3.60 aretokoan, jende ugari kalean gelditu zen kontzertua ikusi ezinik. Arrazoi horregatik, Jamen egingo dute behin betiko emanaldia, eta alboan Arrasateko beste lagun batzuk izango dituzte: Enboskada, Anti-Social eta Des-Kontrol, hain zuzen ere.

Are gehiago, Arkada Sozial taldekoak DVD bat prestatzen dabiltza, azkeneko kontzertu horiek eta bestelako kontuak jasoko dituena.

Lordiren kontzertua martxoaren 2ra atzeratu dute

Iker — Wed, 18 Oct 2006 09:56:34 +0200

Aurrerakoan iragarri genizuen Finlandiako Lordi taldeak urriaren 20an Bergarako Jamen egin beharreko kontzertua kolokan zegoela. Azkenean, bertan behera utzi dute egubakoitzeko emanaldia, eta 2007ko martxoaren 2an izango dira Bergarako aretoan.

Lordi taldeak Eurovision lehiaketa irabazi zuen, eta Europan zehar egin beharreko hainbat emanaldi bertan behera utzi dituzte taldekideetakoren bat gaixorik dagoelako.

Lordik Jamen egin beharreko kontzertua kolokan

iker — Mon, 16 Oct 2006 11:40:59 +0200

Finlandiako Lordi taldeak urriaren 20an Bergarako Jam aretoan egin beharreko kontzertua kolokan dago, taldekidetakoren bat gaixorik dagoelako.

Lordi taldeak Eurovision lehiaketa irabazi zuen, eta horren ondorioz oihartzun handia hartu zuen.

Uda aurretik Europatik barrena egin beharreko "Bringing Back The Balls to Europe" bira iragarri zuten. Espainiako Estatuan lau emanaldi egin behar zituzten: Madrilen, Murtzian, Bartzelonan eta Bergaran, hain zuzen ere.

Lordi taldearen webgunean iragarri dute Espainiako Estatuan egin beharreko emanaldiak bertan behera gelditu direla, eta kontzertuak ematen jarraituko dutela Antwerpen (Belgika) urriaren 22tik aurrera. Horren arrazoia da taldekoren batek laringitisa daukala.

Bergarako Jam aretoak, berriz, jakinarazi digu Murtzia eta Madrilgo kontzertuak bertan behera utzi dituzten arren, oraindik balitekela Bartzelonako eta Bergarako kontzertuak egitea.

Eurovisiongo irabazle Lordi Euskal Herrira etorriko da

Iker — Wed, 26 Jul 2006 23:03:25 +0200

Maiatzean jokatu zen Eurovision txapelketako finala Atenasen eta jende asko zur eta lur utzi zituen txapelketako epaiak: Finlandiako Lordi talde metaleroak irabazi zuen, "Hard rock hallelujah" kantuarekin. Europa aldatzen egongo denaren seinale-edo.

Kontua da taldeak Europan ospea hartu duela, eta urrian Espainiako Estatuan hiru kontzertu egingo dituztela. Are gehiago, horietako bat Bergarako Jam aretoan izango da.

Honako hauek dira datak: urriaren 17an Madrilgo La Rivieran, 19an Bartzelonako Apolon, eta 20an, Bergarako Jam aretoan.

Aurkeztu dugu Danbaka.com

Iker — Fri, 16 Jun 2006 12:42:31 +0200

Atzo, ekainak 15, egin genuen aurkezpena Bergarako gaztetxean. Bertan izan ziren Danbaka.com webgunean bloga duten musika talde batzutako partaideak. Bloga egiteko aukera Euskal Herriko musika talde guztiei dago zabalduta.

Debagoienean dagoen musika talde kopuru handia ikusita eta horiek eragiten dituzten ekimen guztien berri emateko espresuki sortu beharreko tresna baten premia zegoen. Hala, www.danbaka.com webgunea sortzea erabaki du Goienak.

Aurkezpenean izan ziren talde hauetako kideak:

Eskerrik asko etorri zinaten danoi!

Informazio gehiago duzue Goiena.net-eko albiste honetan.