Danbaka.com

Sex Pistols, Dinosaur JR eta beste Azkena Rockera

Iker — Fri, 25 Jul 2008 20:59:45 +0200

Azkena Rock jaialdiak 2008an izango duen edizioa ere disdiratsua izango dela erakutsi dute dagoeneko.

Hain zuzen ere, atzo jakinarazi zuten orain arte iragarritakoez gain, Sex Pistols, Dinosaur JR, The Lemonheads eta Boss Hoss ere arituko direla.

Jaialdia irailaren 4, 5 eta 6an egingo dute Gasteizko Mendizabala gunean, Mendizorrozaren alboan. Antolatzailea Last Tour International promotora da.

Honako taldeak izango dira egunez egun:

Irailaren 4, osteguna:
-The Lemonheads.
-Marky Ramone.
-Radio Moscow.
-Hayseed Dixie.
-The Boss Hoss.
-Yawning Man.
-Lagartija Nick.
... eta beste.

Irailaren 5, egubakoitza:
-Sex Pistols.
-Ray Davies.
-The Sonics.
-Blind Melon.
-Hanoi Rocks.
-Danko Jones.
-Blue Cheer.
-Truly.
-The Quireboys.
-Viaje a 800.
-Sorkun.
-Animal Alpha.

Irailaren 6, zapatua:
-The Jayhawks.
-Dinosaur JR.
-Blues Explosion.
-The Gutter Twins (Mark Lanegan & cía).
-Duff McKagan´s Loaded.
-John Cale & Band.
-Los Lobos.
-Donita Sparks (L7).
-Orange Goblin.
-The Royal Cream.
-Sex Museum.
-Las Culebras.

Azkena Rock 08rako talde gehiago

Iker — Thu, 03 Jul 2008 12:38:07 +0200

Orain dela gutxi iragarri genizuen Azkena Rock 08 jaialdirako taldeen izenak ezagutzera ematen hasi zirela. Talde interesgarri eta ezagun dezente aurreratu zituzten, eta guk albiste baten jaso genituen. Jakingo duzuen moduan, Azkena Rock 08 jaialdia Mendizabalan egingo dute, Gasteizen, irailaren 4an, 5ean eta 6an. Last Tour International enpresa da horren antolatzailea.

Ba dagoeneko izen gehiago eman dituzte ezagutzera. Horien artean badira sorpresak eta talde apartekoak. Hona hemen horietako batzuk: The Kinks taldeko abeslaria izandako Ray Davies, berriro elkartu den The Jayhawks taldea, glam-rockaren errege edo erregina diren Hanoi Rocks, desertuko musika egiten duen Yawning Man, Ramones taldeko biziraule Marky Ramone, hegoaldeko sustraidun rocka egiten duen Hayseed Dixie eta Granadako Lagartija Nick, besteak beste.

Azkena Rock 08ko kartela

Iker — Mon, 16 Jun 2008 10:01:41 +0200

Azkena Rock 08aren kartela ezagutzera eman dute. Last Tour International enpresak urtero antolatzen du Gasteizen, eta aurtengoa irailaren 4, 5 eta 6an egingo dute Mendizabalan.

Jaialdi hau da Euskal Herriko beteranoenetako bat Euskal Herria Zuzenean-en ostean, Bilbao BBK Live eta Kobetasoniken aurretik, jakina. Eta berau da rock-zaleen kuttunena.

Emanaldi gehienak jakitera eman dituzte dagoeneko: The Sonics kondaira-taldea, Jon Spencerren Blues Explosion, Mark Laneganen Gutter Twins, Velvet Underground-eko kide John Cale & Band, The Quireboys, Blue Cheer aitzindariak, Los Lobos, L7-ko Donita Sparks, Blind Melon, Viaje a 800, Sorkun & Vicepresidentes, Sex Museum, Duff McKagan´s Loaded eta beste.

Hiru egunetarako bonoa eskaintza-prezioan jarri dute salgai. Hala, bihartik, ekainaren 17a, uztailaren 10era bitartean erosten dutenek 50 euro ordaindu beharko dituzte. Horiek eskuratzeko hainbat aukera daude: Ticktackticket Interneteko zerbitzua, 902 15 00 25 telefono zenbakia, edota FNAC zein Carrefour merkatal gunetan.

Azkena Rock jaialdiak Gasteizen jarraituko du

Iker — Mon, 10 Dec 2007 15:45:00 +0100

2007ko Azkena Rocken edizioaren gainean zalantza handiak izan ziren kokapenaren eta etorkizunaren gainean, hain zuzen ere. Horren ondorioz, egitaraua oso berandu eman zuten jakitera.

Bada, Last Tour International enpresak jakinarazi du Gasteizko Udaletxeak, Arabako Foru Aldundiak eta Caja Vitalek jaialdiari eman beharreko dirulaguntzak handitzea onartu dutela. Hala, hiru erakundeen artean miloi erdi euro inguru batuko dituzte. Antolatzaileen esanetan, 2008ko ediziorako aurreikusitako kopuruak orain arte urtero jaso dutena hirukoiztu egingo du.

Horren harira, aditzera eman dute jaialdiak Gasteizen jarraituko duela, eta abuztu bukaera eta iraila hasiera artean ospatuko dutela.

Potato taldearen azken kontzertuak

Iker — Fri, 27 Jul 2007 13:45:42 +0200

Potato talde gasteiztarrak abenduaren 31n eskainiko du bere azken kontzertua. Aurretik beste hainbat emanaldi egingo ditu agur moduan.

Abuztuaren 4an, Gasteizko Foruen plazan arituko da 23 urteko ibilbide oparoa egin duen Euskal Herriko reggae-aren aitzindariak. Kontzertu hori grabatu egingo dute, eta Durangoko Azokan salgai izango den disko-liburuan sartuko dute.

Disko-liburu hori kaleratu aurretik, ordea, hiru kantuz osatutako diskoa argitaratuko dute: "Gracias y agur" izango du izena diskoak.

Ruper Ordorika eta Hasier Oleaga Quartet Gasteizko Jazzaldian

Iker — Wed, 18 Jul 2007 10:56:57 +0200

Astelehenean kontzertu berezia egin zuten Mendizorroza kiroldegian Gasteizko Jazzaldiaren barruan.

Hasier Oleaga Quartet, Victor eta Juan de Diego, eta Ruper Ordorika aritu ziren agertoki gainean.

Kontzertu horren gaineko iritziak jaso dituzte Pitin bat blogean.

Gasteizko txosnetarako lehiaketa

Iker — Fri, 08 Jun 2007 18:14:19 +0200

Gasteizko Txosnen elkarteak lehiaketa antolatu du Gasteizko Andra Mari jaietan txosnetako kontzertuetan esku hartuko duten taldeetako bi aukeratzeko.

Lehiaketara 62 musika talde aurkeztu ziren. Horietatik epaimahaiak bost aukeratu zituen; eta Gasteizko Txosnen webgunean nabigatzaileek beste bat aukeratu zuten.

Hala, asteburu honetan, ekainaren 8an eta 9an, sei talde horiek kontzertuak egingo dituzte Gasteizko Helldorado aretoan; eta horietatik epaimahaiak bi aukeratuko ditu; hain justu, Gasteizko jaietan txosnetan zuzenean arituko direnak.

Spike Lee eta bere filmeen soinu bandak Gasteizko Jazzaldian

Iker — Mon, 23 Apr 2007 09:48:17 +0200

Uztailaren 16tik 21era bitartean Gasteizko Jazzaldiaren 31. edizioa ospatuko dute.

Jazzaldian esku hartuko duten izarren artean komeni da nabarmentzea AEBetako Spike Lee film zuzendari ezaguna han izango dela. Leek ez du musikarik joko, baina bere filmetako (Malcolm X, Do right thing...) soinu bandak aurkeztuko ditu, eta hainbat musikarik zuzenean pieza horiek zuzenean joko dituzte. Emanaldi horiek Terence Blanchard tronpeta jotzaile ezagunak gidatuko ditu.

Horrez gain, Jazzaldian beste hainbat musikari ezagun arituko dira: Norah Jones, Ornette Coleman, M. Ward, Angel Celadaren Shap proiektu berria, Euskal Herriko eta AEBetako jazz musikariek osatutako Konexioa (horren barruan Hasier Oleaga, Ruper Ordorika, Victor eta Juan de Diego...) eta beste batzuk.

Elton John maiatzean Gasteizen

danbaka — Wed, 21 Feb 2007 15:35:00 +0100

Sir tituludunik extrabagante eta nabarmenenak kontzertua egingo du datorren maiatzaren 20an Gasteizen. Correok argitaratutakoaren arabera, zezen plaza berrian joko du piano joleak. Torero txapelarekin etorriko da? Zezenekin edo barik, disko berria aurkeztuko du Gasteizen eta hark inauguratuko du gune berriaren programazio musikala.

Vitorixan eta Oñatin kontzertuak

potem — Fri, 19 Jan 2007 13:40:02 +0100

Ze xauk!

Urtarrilaren 27an rock-and-rollaren infernura, Helldoradora, goiatzak, Neubat eta Sharon Stonerrekin.

Eta laster, otsailaren 2an Oñatiko gaztelekuen Izaera eta Neubatekin.

Aio arraioooooo, rock-and-rolla haraino!

Urtarrilean ere zaunka-tour

Zaunka — Wed, 03 Jan 2007 17:44:55 +0100

Ze xauk?

Urtarrilean ere Zaunka egin zuten tourraren jarraituko dugu:

Urtarrilak 5, Bergarako gaztetxean, Amonal eta Lukreciarekin.

Urtarrilak 6, Ondarruko gaztetxean.

Urtarrilak 13, Zaldibarren, Neubatekin.

Urtarrilak 27, Gasteizko Helldoradon, Neubat eta Sharon Stonerrekin.

Azkena Rock-en oso gustoa

sharon — Thu, 07 Sep 2006 15:24:01 +0200

Aupa, lagunak!

Beste behin Gasteizeko Azkena Rock jaialdixa ikustera fan ga, eta oinguan gañea gu be taula gañian!

Jaialdixa hasteko papela guk bete geben, eguen atsaldian, 40º graduko eguzki-stonerrran azpixan. Jende asko keizpetan geldittu zan albuetatik kontzertua ikusten. Gure jarraitzaile fidelak eta beste hainbat lagun, berriz, kamisetia izerdittu ebein eszenatokixan. Guk ahal izan geben dana emun geben, a tope, betiko mouan!!!!

Bestela, ikusgarrixa izan da halako jaialdi bat barrutik ikusteko aukeria eukittia eta backstagien ibilttia. Gañea, organizaziñuak oso ondo tratau gau. Gañea Brant Bjork eta Misfits-eko Jerry Only be ezauketako aukeria euki geben!!!

Hemen dakotzue han ataratako argazki batzuk.

Azkena Rock-erako talde gehiago

Iker — Thu, 22 Jun 2006 15:27:41 +0200

Last Tour International promotorak Gasteizko Azkena Rock jaialdian esku hartuko duten talde gehiago ezagutzera eman ditu.

Azkeneko konfirmazioak honako hauek dira: Buckcherry, Redd Kross, The Nomads, Marah, Diamond Dogs eta Danbaka Debagoieneko I. Musika Lehiaketako irabazle Sharon Stoner talde oñatiarra, besteak beste.

Jaialdia abuztuaren 31tik irailaren 2ra bitartean egingo dute Gasteizko Mendizabalan. Hiru egunetarako bonoak salgai daude, 100 eurotan (gehi banaketa gastuak). Irailaren 2ko kontzertuetarako sarrerak, berriz, 50 eurotan saltzen dituzte. Sarrerak eta bonoak Tick Tack Ticket -en bidez eskura daitezke.

Potemkin hiriburuetako jaietan

Iker — Mon, 19 Jun 2006 10:20:50 +0200

Danbaka Debagoieneko I. Musika Lehiaketan finalista izan ziren taldeak zeresan handia ematen dabiltza oraindik.

Hain zuzen ere, esaterako, Oñatiko Potemkin taldea kontzertuak egiten dabil gelditu barik. Taldeak jakinarazi digunez uda honetan San Ferminetan eta Gasteizko Andramari Zuriaren jaietan emanaldiak egingo ditu.

Uztailaren 7an, Berri Txarrak taldearekin batera joko dute Iruñean; eta abuztuaren 8an Gasteizko jaietan joko dute.

Potemkinen kontzertuen gaineko informazio gehiago, taldearen webgunean edo Matxitxa managementaren bitartez eskura dezakezu.

Azkena Rock-eko kartela ezagutzera ematen hasi dira

Iker — Mon, 05 Jun 2006 10:42:47 +0200

Bazen ordua! Azkenean hasi da Last Tour promotora 2006ko Azkena Rock jaialdian esku hartuko duten taldeak ezagutzera ematen.

Jaialdi hori abuztuaren 31n, irailaren 1ean eta 2an egingo dute Gasteizen, Mendizabalan. Aurtengoa bosgarrena da eta rock-zaleen artean nahiko sendotuta dago.

Aurretik Pearl Jam taldea etorriko zela iragarri zuten. Orain, berriz, jaialdian egongo diren 27 taldeetatik beste 11 konfirmatu dituzte. Hauek dira horietako batzuk: Big Star, Gang Of Four, Kim Salmon & The Surrealists, Young Fresh Fellows, Eagles Of Death Metal, My Morning Jacket, Wolfmother eta Berri Txarrak, besteak beste.

Antolatzaileen esanetan, epe laburrean gainontzeko taldeak ezagutzera emango dituzte.

Bestalde, dagoeneko egin dituzte jaialdiaren aurkezpen kontzertuak Madrilen eta Bartzelonan. Ian Astbury handiak gidatutako The Cult taldeak jo du horietan.